ಶಿವಾಷ್ಟಕಮ್
ಪ್ರಭುಂ ಪ್ರಾಣನಾಥಂ ವಿಭುಂ ವಿಶ್ವನಾಥಂ
ಜಗನ್ನಾಥನಾಥಂ ಸದಾನನ್ದಭಾಜಾಮ್ ।
ಭವದ್ಭವ್ಯಭೂತೇಶ್ವರಂ ಭೂತನಾಥಂ
ಶಿವಂ ಶಙ್ಕರಂ ಶಮ್ಭುಮ್ ಈಶಾನಮ್ ಈಡೇ ॥ 1 ॥
ಗಲೇ ರುಣ್ಡಮಾಲಂ ತನೌ ಸರ್ಪಜಾಲಂ
ಮಹಾಕಾಲಕಾಲಂ ಗಣೇಶಾದಿಪಾಲಮ್ ।
ಜಟಾಜೂಟಗಙ್ಗೋತ್ತರಙ್ಗೈರ್ ವಿಶಾಲಂ
ಶಿವಂ ಶಙ್ಕರಂ ಶಮ್ಭುಮ್ ಈಶಾನಮ್ ಈಡೇ ॥ 2 ॥
ಮುದಾಮಾಕರಂ ಮಣ್ಡನಂ ಮಣ್ಡಯನ್ತಂ
ಮಹಾಮಣ್ಡಲಂ ಭಸ್ಮಭೂಷಾಧರಂ ತಮ್ ।
ಅನಾದಿಂ ಹ್ಯಪಾರಂ ಮಹಾಮೋಹಮಾರಂ
ಶಿವಂ ಶಙ್ಕರಂ ಶಮ್ಭುಮ್ ಈಶಾನಮ್ ಈಡೇ ॥ 3 ॥
ವಟಾಧೋನಿವಾಸಂ ಮಹಾಟ್ಟಾಟ್ಟಹಾಸಂ
ಮಹಾಪಾಪನಾಶಂ ಸದಾ ಸುಪ್ರಕಾಶಮ್ ।
ಗಿರೀಶಂ ಗಣೇಶಂ ಸುರೇಶಂ ಮಹೇಶಂ
ಶಿವಂ ಶಙ್ಕರಂ ಶಮ್ಭುಮ್ ಈಶಾನಮ್ ಈಡೇ ॥ 4 ॥
ಗಿರೀನ್ದ್ರಾತ್ಮಜಾಸಙ್ಗೃಹೀತಾರ್ಧದೇಹಂ
ಗಿರೌ ಸಂಸ್ಥಿತಂ ಸರ್ವದಾಪನ್ನಗೇಹಮ್ ।
ಪರಬ್ರಹ್ಮ ಬ್ರಹ್ಮಾದಿಭಿರ್ ವನ್ದ್ಯಮಾನಂ
ಶಿವಂ ಶಙ್ಕರಂ ಶಮ್ಭುಮ್ ಈಶಾನಮ್ ಈಡೇ ॥ 5 ॥
ಕಪಾಲಂ ತ್ರಿಶೂಲಂ ಕರಾಭ್ಯಾಂ ದಧಾನಂ
ಪದಾಮ್ಭೋಜನಮ್ರಾಯ ಕಾಮಂ ದದಾನಮ್ ।
ಬಲೀವರ್ದಯಾನಂ ಸುರಾಣಾಂ ಪ್ರಧಾನಂ
ಶಿವಂ ಶಙ್ಕರಂ ಶಮ್ಭುಮ್ ಈಶಾನಮ್ ಈಡೇ ॥ 6 ॥
ಶರಚ್ಚನ್ದ್ರಗಾತ್ರಂ ಗಣಾನನ್ದಪಾತ್ರಂ
ತ್ರಿನೇತ್ರಂ ಪವಿತ್ರಂ ಧನೇಶಸ್ಯ ಮಿತ್ರಮ್ ।
ಅಪರ್ಣಾಕಲತ್ರಂ ಸದಾ ಸಚ್ಚರಿತ್ರಂ
ಶಿವಂ ಶಙ್ಕರಂ ಶಮ್ಭುಮ್ ಈಶಾನಮ್ ಈಡೇ ॥ 7 ॥
ಹರಂ ಸರ್ಪಹಾರಂ ಚಿತಾಭೂವಿಹಾರಂ
ಭವಂ ವೇದಸಾರಂ ಸದಾ ನಿರ್ವಿಕಾರಮ್ ।
ಶ್ಮಶಾನೇ ವಸನ್ತಂ ಮನೋಜಂ ದಹನ್ತಂ
ಶಿವಂ ಶಙ್ಕರಂ ಶಮ್ಭುಮ್ ಈಶಾನಮ್ ಈಡೇ ॥ 8 ॥
ಸ್ವಯಂ ಯಃ ಪ್ರಭಾತೇ ನರಃ ಶೂಲಪಾಣೇ
ಪಠೇತ್ ಸ್ತೋತ್ರರತ್ನಂ ತ್ವ್ ಇಹ ಪ್ರಾಪ್ಯ ರತ್ನಮ್ ।
ಸುಪುತ್ರಂ ಸುಧಾನ್ಯಂ ಸುಮಿತ್ರಂ ಕಲತ್ರಂ
ವಿಚಿತ್ರೈಃ ಸಮಾರಾಧ್ಯ ಮೋಕ್ಷಂ ಪ್ರಯಾತಿ ॥