శ్రీ వేంకటేశ్వర అష్టోత్తర శత నామ స్తోత్రం
శ్రీ వేఙ్కటేశః శ్రీనివాసో లక్ష్మీపతిరనామయః ।
అమృతాంశో జగద్వన్ద్యో గోవిన్దశ్శాశ్వతః ప్రభుః ॥ 1 ॥
శేషాద్రినిలయో దేవః కేశవో మధుసూదనః ।
అమృతో మాధవః కృష్ణః శ్రీహరిర్జ్ఞానపఞ్జరః ॥ 2 ॥
శ్రీవత్సవక్షాస్సర్వేశో గోపాలః పురుషోత్తమః ।
గోపీశ్వరః పరఞ్జ్యోతిర్వైకుణ్ఠపతిరవ్యయః ॥ 3 ॥
సుధాతనుర్యాదవేన్ద్రో నిత్యయౌవనరూపవాన్ ।
చతుర్వేదాత్మకో విష్ణురచ్యుతః పద్మినీప్రియః ॥ 4 ॥
ధరాపతిస్సురపతిర్నిర్మలో దేవపూజితః ।
చతుర్భుజశ్చక్రధరస్త్రిధామా త్రిగుణాశ్రయః ॥ 5 ॥
నిర్వికల్పో నిష్కలఙ్కో నిరన్తరో నిరఞ్జనః ।
నిరాభాసో నిత్యతృప్తో నిర్గుణో నిరుపద్రవః ॥ 6 ॥
గదాధరశ్శార్ఙ్గపాణిర్నన్దకీ శఙ్ఖధారకః ।
అనేకమూర్తిరవ్యక్తః కటిహస్తో వరప్రదః ॥ 7 ॥
అనేకాత్మా దీనబన్ధురార్తలోకాఽభయప్రదః ।
ఆకాశరాజవరదో యోగిహృత్పద్మమన్దిరః ॥ 8 ॥
దామోదరో జగత్పాలః పాపఘ్నో భక్తవత్సలః ।
త్రివిక్రమశ్శింశుమారో జటామకుటశోభితః ॥ 9 ॥
శఙ్ఖమధ్యోల్లసన్మఞ్జుకిఙ్కిణ్యాఢ్యకరణ్డకః ।
నీలమేఘశ్యామతనుర్బిల్వపత్రార్చనప్రియః ॥ 10 ॥
జగద్వ్యాపీ జగత్కర్తా జగత్సాక్షీ జగత్పతిః ।
చిన్తితార్థప్రదో జిష్ణుర్దాశార్హో దశరూపవాన్ ॥ 11 ॥
దేవకీనన్దనశ్శౌరిర్హయగ్రీవో జనార్దనః ।
కన్యాశ్రవణతారేజ్యః పీతామ్బరధరోఽనఘః ॥ 12 ॥
వనమాలీ పద్మనాభో మృగయాసక్తమానసః ।
అశ్వారూఢః ఖడ్గధారీ ధనార్జనసముత్సుకః ॥ 13 ॥
ఘనసారలసన్మధ్యకస్తూరీతిలకోజ్జ్వలః ।
సచ్చిదానన్దరూపశ్చ జగన్మఙ్గలదాయకః ॥ 14 ॥
యజ్ఞరూపో యజ్ఞభోక్తా చిన్మయః పరమేశ్వరః ।
పరమార్థప్రదశ్శాన్తశ్శ్రీమాన్ దోర్దణ్డ విక్రమః ॥ 15 ॥
పరాత్పరః పరబ్రహ్మా శ్రీవిభుర్జగదీశ్వరః ।
ఏవం శ్రీ వేఙ్కటేశస్య నామ్నామష్టోత్తరం శతమ్ ॥ 16 ॥
పఠతాం శృణ్వతాం భక్త్యా సర్వాభీష్టప్రదం శుభమ్ ।
త్రిసన్ధ్యం యః పఠేన్నిత్యం సర్వాన్ కామానవాప్నుయాత్ ॥ 17 ॥
ఇతి శ్రీ బ్రహ్మాణ్డపురాణే శ్రీ వేఙ్కటేశ్వరాష్టోత్తరశతనామ స్తోత్రమ్ ।