Home › Pooja Library › Mahabaleshwara Ashtakam — ಕನ್ನಡ

ಮಹಾಬಲೇಶಾಷ್ಟಕಮ್

ವಿಶಾಲಕರುಣಂ ವಿಭುಂ ತರುಣಚನ್ದ್ರ ಸದ್ಭೂಷಣಂ
ಧರಾಧರಸುತಾಪತಿಂ ತರುಣಚನ್ದ್ರಕೋಟಿಪ್ರಭಮ್ ।
ಮನೋರಥವಿವರ್ಧನಂ ದುರಿತವರ್ಗವಿಧ್ವಂಸನಂ
ಮಹಾಬಲಶಿವಂ ಭಜೇ ಮಹಿತಸರ್ವಕಲ್ಯಾಣದಮ್ ॥ 1॥

ಸಮಾಹಿತಮನೋನುತಂ ಶಮಿತದೈತ್ಯದಮ್ಭಂ ಪ್ರಭುಂ
ಭವಾರ್ಣವವಿಶೋಷಣಂ ವಿಹಿತಭಕ್ತಸನ್ತೋಷಣಮ್ ।
ಚರಾಚರಸುಮನ್ದಿರಂ ವಿಧೃತಬಾಲಚನ್ದ್ರಂ ಶಿವಂ
ನಮಾಮಿ ಗಿರಿಜಾಪತಿಂ ನಲಿನನೇತ್ರಮಿತ್ರಂ ಪರಮ್ ॥ 2॥

ಪರಾಭವವಿವರ್ಜಿತಂ ಜಯ ಜಯೇತಿ ದೇವೈರ್ನುತಂ
ನಮಾಮಿ ಜಗತಾಂ ಗುರುಂ ಜನನಮೃತ್ಯುದೂರಂ ಹರಮ್ ।
ಜನಾರ್ದನಸಹೋದರೀನಯನಪದ್ಮಭಾನೂಪಮಂ
ಪುರಾಣಪುರುಷಾರ್ಚಿತಂ ಶರಣಲೋಕಸಂರಕ್ಷಕಮ್ ॥ 3॥

ದುರಾಚರಣಭೀಷಣಂ ದುರಿತವರ್ಗಸಂಹಾರಿಣಂ
ಮಹಾಗಿರಿವರಾಶ್ರಯಂ ಮುನಿವರೇಣ್ಯಸಂಸೇವಿತಮ್ ।
ಹಿರಣ್ಯನಿಧಿದಾಯಕಂ ಕರುಣಯೈವ ಸಂರಕ್ಷಕಂ
ಕಲಾಧರಸುಶೇಖರಂ ನಮತ ನಿತ್ಯಕಲ್ಯಾಣದಮ್ ॥ 4॥

ಮಹಾಗದವಿದಾರಣಂ ಮದನಗರ್ವವಿಶ್ಲೋಷಣಂ
ಭವಂ ತ್ರಿಪುರಘಾತಿನಂ ಹ್ಯನಲನೇತ್ರಮಿನ್ದ್ರಾರ್ಚಿತಮ್ ।
ಗಿರೀನ್ದ್ರತನಯಾಸಖಂ ಸಕಲಸೌಖ್ಯಸನ್ದಾಯಕಂ
ಮಹಾಬಲಮುಪಾಸ್ಮಹೇ ನಿಗಮಗಮ್ಯರೂಪಂ ಶಿವಮ್ ॥ 5॥

ಶಿಲೀನ್ದ್ರಕುಸುಮಪ್ರಿಯಂ ವರಶಿರೀಷಮಾಲ್ಯಾನ್ವಿತಂ
ಸುಬಿಲ್ವದಲಪೂಜಿತಂ ವನಜದಿವ್ಯಪುಷ್ಪಪ್ರಿಯಮ್ ।
ವಿರಿಞ್ಚಿಹರಿಸನ್ನುತಂ ಭಜತ ಪಞ್ಚವಕ್ತ್ರಂ ಪ್ರಭುಂ
ಪ್ರಪಞ್ಚ ಪರಿಪಾಲಕಂ ವರಚಿರನ್ತನಾಭ್ಯರ್ಚಿತಮ್ ॥ 6॥

ಚಿರನ್ತರವಚೋನುತಂ ಹ್ಯಘಚಯಸ್ಯ ವಿಧ್ವಂಸಕಂ
ಮಮಾಶು ಕವಿತಾಪ್ರದಂ ಕರಿಮುಖಸ್ಯ ತಾತಂ ವಿಭುಮ್ ।
ಕವೀನ್ದ್ರ ಪರಿಸನ್ನುತಂ ನಮತ ನೀಲಕಣ್ಠಂ ವರಂ
ವರಪ್ರದಮಹಾಬಲಂ ಸುಗುಣಕೃಷ್ಣಭೂಪಾವನಮ್ ॥ 7॥

ಮನೋರಥವಿದಾಯಕಂ ಮನುಕುಲೇಶಸಮ್ಪೂಜಿತಂ
ಹ್ಯುಮಾರ್ಧಸುಕಲೇವರಂ ವಿಧೃತದಿವ್ಯಗಙ್ಗಾಪಗಮ್ ।
ವೃಷೇನ್ದ್ರವರವಾಹನಂ ಸುರವರೇನ್ದ್ರ ಸನ್ತೋಷಣಂ
ಜಗದ್ಭರಣಮೀಶ್ವರಂ ತರುಣಚನ್ದ್ರಮೌಲಿಂ ಭಜೇ ॥ 8॥

ಮಹಾಬಲನುತಿಂ ಜನಾ ವಚಸಿ ಧಾರಯನ್ತ್ಯನ್ವಹಂ
ನೃಕೇಸರಿಗಿರೇರಿತಾಂ ಸಕಲಸೌಖ್ಯಸಮ್ಪತ್ಪ್ರದಾಮ್ ।
ಸುಸನ್ತತಿವಿಧಾಯಿನೀಂ ಶುಭಕದಮ್ಬ ಸಂವರ್ಧಿನೀಂ
ಭಜನ್ತಿ ಶುಭಮೇವ ತೇ ಶಿವಪದಾಬ್ಜಭಕ್ತಾ ಭುವಿ ॥ 9॥

OHTCC Assistant ✕
🙏 Namaste! How can I help you today?