Home › Pooja Library › Mahabaleshwara Ashtakam — English

Mahabaleshwara Ashtakam

viśālakaruṇaṃ vibhuṃ taruṇacandra sadbhūṣaṇaṃ
dharādharasutāpatiṃ taruṇacandrakoṭiprabham ।
manorathavivardhanaṃ duritavargavidhvaṃsanaṃ
mahābalaśivaṃ bhaje mahitasarvakalyāṇadam ॥ 1॥

samāhitamanonutaṃ śamitadaityadambhaṃ prabhuṃ
bhavārṇavaviśoṣaṇaṃ vihitabhaktasantoṣaṇam ।
carācarasumandiraṃ vidhṛtabālacandraṃ śivaṃ
namāmi girijāpatiṃ nalinanetramitraṃ param ॥ 2॥

parābhavavivarjitaṃ jaya jayeti devairnutaṃ
namāmi jagatāṃ guruṃ jananamṛtyudūraṃ haram ।
janārdanasahodarīnayanapadmabhānūpamaṃ
purāṇapuruṣārcitaṃ śaraṇalokasaṃrakṣakam ॥ 3॥

durācaraṇabhīṣaṇaṃ duritavargasaṃhāriṇaṃ
mahāgirivarāśrayaṃ munivareṇyasaṃsevitam ।
hiraṇyanidhidāyakaṃ karuṇayaiva saṃrakṣakaṃ
kalādharasuśekharaṃ namata nityakalyāṇadam ॥ 4॥

mahāgadavidāraṇaṃ madanagarvaviśloṣaṇaṃ
bhavaṃ tripuraghātinaṃ hyanalanetramindrārcitam ।
girīndratanayāsakhaṃ sakalasaukhyasandāyakaṃ
mahābalamupāsmahe nigamagamyarūpaṃ śivam ॥ 5॥

śilīndrakusumapriyaṃ varaśirīṣamālyānvitaṃ
subilvadalapūjitaṃ vanajadivyapuṣpapriyam ।
viriñciharisannutaṃ bhajata pañcavaktraṃ prabhuṃ
prapañca paripālakaṃ varacirantanābhyarcitam ॥ 6॥

cirantaravaconutaṃ hyaghacayasya vidhvaṃsakaṃ
mamāśu kavitāpradaṃ karimukhasya tātaṃ vibhum ।
kavīndra parisannutaṃ namata nīlakaṇṭhaṃ varaṃ
varapradamahābalaṃ suguṇakṛṣṇabhūpāvanam ॥ 7॥

manorathavidāyakaṃ manukuleśasampūjitaṃ
hyumārdhasukalevaraṃ vidhṛtadivyagaṅgāpagam ।
vṛṣendravaravāhanaṃ suravarendra santoṣaṇaṃ
jagadbharaṇamīśvaraṃ taruṇacandramauliṃ bhaje ॥ 8॥

mahābalanutiṃ janā vacasi dhārayantyanvahaṃ
nṛkesarigireritāṃ sakalasaukhyasampatpradām ।
susantatividhāyinīṃ śubhakadamba saṃvardhinīṃ
bhajanti śubhameva te śivapadābjabhaktā bhuvi ॥ 9॥

OHTCC Assistant ✕
🙏 Namaste! How can I help you today?