Home › Pooja Library › Hanuman Ashtakam — English

Hanuman Ashtakam

śrīraghurājapadābjaniketana paṃkajalocana maṃgalarāśe
caṃḍamahābhujadaṃḍa surārivikhaṃḍanapaṃḍita pāhi dayālo ।
pātakinaṃ ca samuddhara māṃ mahatāṃ hi satāmapi mānamudāraṃ
tvāṃ bhajato mama dehi dayāghana he hanuman svapadāṃbujadāsyam ॥ 1 ॥

saṃsṛtitāpamahānaladagdhatanūruhamarmatanorativelaṃ
putradhanasvajanātmagṛhādiṣu saktamateratikilbiṣamūrteḥ ।
kenacidapyamalena purākṛtapuṇyasupuṃjalavena vibho vai
tvāṃ bhajato mama dehi dayāghana he hanuman svapadāṃbujadāsyam ॥ 2 ॥

saṃsṛtikūpamanalpamaghoranidāghanidānamajasramaśeṣaṃ
prāpya suduḥkhasahasrabhujaṃgaviṣaikasamākulasarvatanorme ।
ghoramahākṛpaṇāpadameva gatasya hare patitasya bhavābdhau
tvāṃ bhajato mama dehi dayāghana he hanuman svapadāṃbujadāsyam ॥ 3 ॥

saṃsṛtisiṃdhuviśālakarālamahābalakālajhaṣagrasanārtaṃ
vyagrasamagradhiyaṃ kṛpaṇaṃ ca mahāmadanakrasucakrahṛtāsum ।
kālamahārasanorminipīḍitamuddhara dīnamananyagatiṃ māṃ
tvāṃ bhajato mama dehi dayāghana he hanuman svapadāṃbujadāsyam ॥ 4 ॥

saṃsṛtighoramahāgahane carato maṇiraṃjitapuṇyasumūrteḥ
manmathabhīkaraghoramahogramṛgapravarārditagātrasusaṃdheḥ ।
matsaratāpaviśeṣanipīḍitabāhyamateśca kathaṃ cidameyaṃ
tvāṃ bhajato mama dehi dayāghana he hanuman svapadāṃbujadāsyam ॥ 5 ॥

saṃsṛtivṛkṣamanekaśatāghanidānamanaṃtavikarmasuśākhaṃ
duḥkhaphalaṃ karaṇādipalāśamanaṃgasupuṣpamaciṃtyasumūlam ।
taṃ hyadhiruhya hare patitaṃ śaraṇāgatameva vimocaya mūḍhaṃ
tvāṃ bhajato mama dehi dayāghana he hanuman svapadāṃbujadāsyam ॥ 6 ॥

saṃsṛtipannagavaktrabhayaṃkaradaṃṣṭramahāviṣadagdhaśarīraṃ
prāṇavinirgamabhītisamākulamaṃdamanāthamatīva viṣaṇṇam ।
mohamahākuhare patitaṃ dayayoddhara māmajiteṃdriyakāmaṃ
tvāṃ bhajato mama dehi dayāghana he hanuman svapadāṃbujadāsyam ॥ 7 ॥

iṃdriyanāmakacoragaṇairhṛtatattvavivekamahādhanarāśiṃ
saṃsṛtijālanipātitameva mahābalibhiśca vikhaṃḍitakāyam ।
tvatpadapadmamanuttamamāśritamāśu kapīśvara pāhi kṛpālo
tvāṃ bhajato mama dehi dayāghana he hanuman svapadāṃbujadāsyam ॥ 8 ॥

brahmamarudgaṇarudramaheṃdrakirīṭasukoṭilasatpadapīṭhaṃ
dāśarathiṃ japati kṣitimaṃḍala eṣa nidhāya sadaiva hṛdabje ।
tasya hanūmata eva śivaṃkaramaṣṭakametadaniṣṭaharaṃ vai
yaḥ satataṃ hi paṭhetsa naro labhate’cyutarāmapadābjanivāsam ॥ 9 ॥

iti śrī madhusūdanāśrama śiṣyā’cyutaviracitaṃ śrīmaddanumadaṣṭakam ।

OHTCC Assistant ✕
🙏 Namaste! How can I help you today?