Sri Ganesha (Ganapati) Suktam
Rigveda 8.81
ā tū na̍ indra kṣu̱mantaṃ̎ ci̱traṃ grā̱bhaṃ saṃ gṛ̍bhāya ।
ma̱hā̱ha̱stī dakṣi̍ṇena ॥ 1 ॥
vi̱dmā hi tvā̎ tuvikū̱rmiṃ tu̱vide̎ṣṇaṃ tu̱vīma̍gham ।
tu̱vi̱mā̱tramavo̎bhiḥ ॥ 2 ॥
na̱hi tvā̎ śūra de̱vā na martā̎so̱ ditsa̎ntam ।
bhī̱maṃ na gāṃ vā̱raya̎nte ॥ 3 ॥
eto̱ nvindraṃ̱ stavā̱meśā̎naṃ̱ vasvaḥ̍ sva̱rāja̎m ।
na rādha̍sā mardhiṣannaḥ ॥ 4 ॥
prasto̎ṣa̱dupa̍ gāsiṣa̱cchrava̱tsāma̍ gī̱yamā̎nam ।
a̱bhi rādha̍sā jugurat ॥ 5 ॥
ā no̎ bhara̱ dakṣi̍ṇenā̱bhi sa̱vyena̱ pra mṛ̍śa ।
indra̱ mā no̱ vaso̱rnirbhā̎k ॥ 6 ॥
upa̍ krama̱svā bha̍ra dhṛṣa̱tā dhṛ̍ṣṇo̱ janā̎nām ।
adā̎śūṣṭarasya̱ vedaḥ̍ ॥ 7 ॥
indra̱ ya u̱ nu te̱ asti̱ vājo̱ vipre̎bhiḥ̱ sani̍tvaḥ ।
a̱smābhiḥ̱ su taṃ sa̍nuhi ॥ 8 ॥
sa̱dyo̱juva̍ste̱ vājā̎ a̱smabhyaṃ̎ vi̱śvaśca̎ndrāḥ ।
vaśai̎śca ma̱kṣū ja̍rante ॥ 9 ॥
Rigveda 2.23
ga̱ṇānāṃ̎ tvā ga̱ṇapa̍tiṃ havāmahe ka̱viṃ ka̍vī̱nāmu̍pa̱maśra̍vastamam ।
jye̱ṣṭha̱rājaṃ̱ brahma̍ṇāṃ brahmaṇaspata̱ ā naḥ̍ śṛ̱ṇvannū̱tibhiḥ̍ sīda̱ sāda̍nam ॥ 10 ॥
Rigveda 10.112
niṣusī̎da gaṇapate ga̱ṇeṣu̱ tvāmā̎hu̱rvipra̍tamaṃ kavī̱nām ।
na ṛ̱te tvatkri̍yate̱ kiṃ ca̱nāre ma̱hāma̱rkaṃ ma̍ghavañci̱trama̍rca ॥ 11 ॥
a̱bhi̱khyā no̎ maghava̱nnādha̍mānā̱nsakhe̎ bo̱dhi va̍supate̱ sakhī̎nām ।
raṇaṃ̎ kṛdhi raṇakṛtsatyaśu̱ṣmābha̍kte ci̱dā bha̍jā rā̱ye a̱smān ॥ 12 ॥