Saraswati Suktam (Rigveda)
Rigveda 6.61
i̱yama̍dadādrabha̱samṛ̍ṇa̱cyuta̱ṃ divo̎dāsaṃ vadhrya̱śvāya̍ dā̱śuṣe̎ ।
yā śaśva̎ntamāca̱khaśadā̎va̱saṃ pa̱ṇiṃ tā te̎ dā̱trāṇi̍ tavi̱ṣā sa̍rasvati ॥ 1 ॥
i̱yaṃ śuṣme̎bhirbisa̱khā i̍vāruja̱tsānu̍ girī̱ṇāṃ ta̍vi̱ṣebhi̍rū̱rmibhi̍ḥ ।
pā̱rā̱va̱ta̱ghnīmava̍se suvṛ̱ktibhi̍ssara̍svatī̱ mā vi̍vāsema dhī̱tibhi̍ḥ ॥ 2 ॥
sara̍svati deva̱nido̱ ni ba̍rhaya pra̱jāṃ viśva̍sya̱ bṛsa̍yasya mā̱yina̍ḥ ।
u̱ta kṣi̱tibhyo̱’vanī̎ravindo vi̱ṣame̎bhyo asravo vājinīvati ॥ 3 ॥
praṇo̎ de̱vī sara̍svatī̱ vāje̎bhirvā̱jinī̎vatī ।
dhī̱nāma̍vi̱trya̍vatu ॥ 4 ॥
yastvā̎ devi sarasvatyupabrū̱te dhane̎ hi̱te ।
indra̱ṃ na vṛ̍tra̱tūrye̎ ॥ 5 ॥
tvaṃ de̎vi sarasva̱tyavā̱ vāje̎ṣu vājini ।
radā̎ pū̱ṣeva̍ naḥ sa̱nim ॥ 6 ॥
u̱ta syā na̱ḥ sara̍svatī gho̱rā hira̎ṇyavartaniḥ ।
vṛ̱tra̱ghnī va̍ṣṭi suṣṭu̱tim ॥ 7 ॥
yasyā̎ ana̱nto ahru̍tastve̱ṣaśca̍ri̱ṣṇura̎rṇa̱vaḥ ।
ama̱ścara̍ti̱ roru̍vat ॥ 8 ॥
sā no̱ viśvā̱ ati̱ dviṣa̱ḥ svasṝ̎ra̱nyā ṛ̱tāva̍rī ।
ata̱nnahe̎va̱ sūrya̍ḥ ॥ 9 ॥
u̱ta na̍ḥ pri̱yā pri̱yāsu̍ sa̱ptasva̍sā̱ suju̍ṣṭā ।
sara̍svatī̱ stomyā̎ bhūt ॥ 10 ॥
ā̱pa̱pruṣī̱ pārthi̍vānyu̱ru rajo̎ a̱ntari̍kṣam ।
sara̍svatī ni̱daspā̎tu ॥ 11 ॥
tri̱ṣa̱dhasthā̎ sa̱ptadhā̎tu̱ḥ pañca̍ jā̱tā va̱rdhaya̎ntī ।
vāje̎vāje̱ havyā̎ bhūt ॥ 12 ॥
pra yā ma̍hi̱mnā ma̱hinā̎su̱ ceki̍te dyu̱mnebhi̍ra̱nyā a̱pasā̎ma̱pasta̍mā ।
ratha̍ iva bṛha̱tī vi̱bhvane̎ kṛ̱topa̱stutyā̎ ciki̱tuṣā̱ sara̍svatī ॥ 13 ॥
sara̍svatya̱bhi no̎ neṣi̱ vasyo̱ māpa̍ spharī̱ḥ paya̍sā̱ mā na̱ ā dha̍k ।
ju̱ṣasva̍ naḥ sa̱khyā ve̱śyā̎ ca̱ mā tvat kṣetrā̱ṇyara̍ṇāni ganma ॥ 14 ॥
Rigveda 7.95
pra kṣoda̍sā̱ dhāya̍sā sasra e̱ṣā sara̍svatī dha̱ruṇa̱māya̍sī̱ pūḥ ।
pra̱bāba̍dhānā ra̱thye̎va yāti̱ viśvā̎ a̱po ma̍hi̱nā sindhu̍ra̱nyāḥ ॥ 15 ॥
ekā̎ceta̱tsara̍svatī na̱dīnā̱ṃ śuci̎rya̱tī gi̱ribhya̱ ā sa̍mu̱drāt ।
rā̱yaśceta̎ntī̱ bhuva̍nasya̱ bhūre̎rghṛ̱taṃ payo̎ duduhe̱ nāhu̍ṣāya ॥ 16 ॥
sa vā̎vṛdhe̱ naryo̱ yoṣa̍ṇāsu̱ vṛṣā̱ śiśu̎rvṛṣa̱bho ya̱jñiyā̎su ।
sa vā̱jina̎ṃ ma̱ghava̍dbhyo dadhāti̱ vi sā̱taye̎ ta̱nva̎ṃ māmṛjīta ॥ 17 ॥
u̱ta syā na̱ḥ sara̍svatī juṣā̱ṇopa̍ śravatsu̱bhagā̎ ya̱jñe a̱smin ।
mi̱tajñu̍bhirnama̱syai̎riyā̱nā rā̱yā yu̱jā ci̱dutta̍rā̱ sakhi̍bhyaḥ ॥ 18 ॥
i̱mā juhvā̎nā yu̱ṣmadā namo̎bhi̱ḥ prati̱ stoma̎ṃ sarasvati juṣasva ।
tava̱ śarma̎npri̱yata̍me̱ dadhā̎nā̱ upa̍ stheyāma śara̱ṇaṃ na vṛ̱kṣam ॥ 19 ॥
a̱yamu̍ te sarasvati̱ vasi̍ṣṭho̱ dvārā̎vṛ̱tasya̍ subhage̱ vyā̎vaḥ ।
vardha̍ śubhre stuva̱te rā̎si̱ vājā̍nyū̱yaṃ pā̎ta sva̱stibhi̱ḥ sadā̎ naḥ ॥ 20 ॥
Rigveda 7.96
bṛ̱hadu̍ gāyiṣe̱ vaco̎’su̱ryā̎ na̱dīnā̎m ।
sara̍svatī̱minma̍hayā suvṛ̱ktibhi̱sstomai̎rvasiṣṭha̱ roda̍sī ॥ 21 ॥
u̱bhe yatte̎ mahi̱nā śu̍bhre̱ andha̍sī adhikṣi̱yanti̍ pū̱rava̍ḥ ।
sā no̎ bodhyavi̱trī ma̱rutsa̍khā̱ coda̱ rādho̎ ma̱ghonā̎m ॥ 22 ॥
bha̱dramidbha̱drā kṛ̍ṇava̱tsara̍sva̱tyaka̍vārī cetati vā̱jinī̎vatī ।
gṛ̱ṇā̱nā ja̍madagni̱vatstu̍vā̱nā ca̍ vasiṣṭha̱vat ॥ 23 ॥
ja̱nī̱yanto̱ nvagra̍vaḥ putrī̱yanta̍ḥ su̱dāna̍vaḥ ।
sara̍svantaṃ havāmahe ॥ 24 ॥
ye te̎ sarasva ū̱rmayo̱ madhu̍manto ghṛta̱ścuta̍ḥ ।
tebhi̎rno’vi̱tā bha̱va ॥ 25 ॥
pī̱pi̱vāṃsa̱ṃ sara̍svata̱ḥ stana̱ṃ yo vi̱śvada̍rśataḥ ।
bha̱kṣī̱mahi̍ pra̱jāmiṣam̎ ॥ 26 ॥
Rigveda 2.41.16–18
ambi̍tame̱ nadī̎tame̱ devi̍tame̱ sara̍svati ।
a̱pra̱śa̱stā i̍va smasi̱ praśa̍stimamba naskṛdhi ॥ 27 ॥
tve viśvā̎ sarasvati śri̱tāyū̎ṃṣi de̱vyām ।
śu̱naho̎treṣu matsva pra̱jāṃ de̎vi didiḍḍhi naḥ ॥ 28 ॥
i̱mā brahma̍ sarasvati ju̱ṣasva̍ vājinīvati ।
yā te̱ manma̍ gṛtsama̱dā ṛ̍tāvari pri̱yā de̱veṣu̱ juhva̍ti ॥ 29 ॥
Rigveda 1.3.10–12
pā̱va̱kā na̱ḥ sara̍svatī̱ vāje̎bhirvā̱jinī̎vatī ।
ya̱jñaṃ va̍ṣṭu dhi̱yāva̍suḥ ॥ 30 ॥
co̱da̱yi̱trī sū̱nṛtā̎nā̱ṃ ceta̎ntī sumatī̱nām ।
ya̱jñaṃ da̍dhe̱ sara̍svatī ॥ 31 ॥
ma̱ho arṇa̱ḥ sara̍svatī̱ pra ce̎tayati ke̱tunā̎ ।
dhiyo̱ viśvā̱ vi rā̎jati ॥ 32 ॥
Rigveda 10.17.7–9
sara̍svatīṃ deva̱yanto̎ havante̱ sara̍svatīmadhva̱re tā̱yamā̎ne ।
sara̍svatīṃ su̱kṛto̎ ahvayanta̱ sara̍svatī dā̱śuṣe̱ vārya̎ṃ dāt ॥ 33 ॥
sara̍svati̱ yā sa̱ratha̎ṃ ya̱yātha̍ sva̱dhābhi̍rdevi pi̱tṛbhi̱rmada̎ntī ।
ā̱sadyā̱sminba̱rhiṣi̍ mādayasvānamī̱vā iṣa̱ ā dhe̎hya̱sme ॥ 34 ॥
sara̍svatī̱ṃ yāṃ pi̱taro̱ hava̎nte dakṣi̱ṇā ya̱jñama̍bhi̱nakṣa̍māṇāḥ ।
sa̱ha̱srā̱rghami̱lo atra̍ bhā̱gaṃ rā̱yaspoṣa̱ṃ yaja̍māneṣu dhehi ॥ 35 ॥
Rigveda 5.43.11
ā no̎ di̱vo bṛ̍ha̱taḥ parva̍tā̱dā sara̍svatī yaja̱tā ga̎ntu ya̱jñam ।
hava̎ṃ de̱vī ju̍juṣā̱ṇā ghṛ̱tācī̎ śa̱gmāṃ no̱ vāca̍muśa̱tī śṛ̍ṇotu ॥ 36 ॥
Rigveda 2.32.4–8
rā̱kāma̱haṃ su̱havā̎ṃ suṣṭu̱tī hu̍ve śṛ̱ṇotu̍ naḥ su̱bhagā̱ bodha̍tu̱ tmanā̎ ।
sīvya̱tvapa̍ḥ sū̱cyācchi̍dyamānayā̱ dadā̎tu vī̱raṃ śa̱tadā̎yamu̱kthyam̎ ॥ 37 ॥
yāste̎ rāke suma̱taya̍ḥ su̱peśa̍so̱ yābhi̱rdadā̎si dā̱śuṣe̱ vasū̎ni ।
tābhi̎rno a̱dya su̱manā̎ u̱pāga̍hi sahasrapo̱ṣaṃ su̍bhage̱ rarā̎ṇā ॥ 38 ॥
sinī̎vāli̱ pṛthu̍ṣṭuke̱ yā de̱vānā̱masi̱ svasā̎ ।
ju̱ṣasva̍ ha̱vyamāhu̍taṃ pra̱jāṃ de̎vi didiḍḍhi naḥ ॥ 39 ॥
yā su̍bā̱huḥ sva̎ṅgu̱riḥ su̱ṣūmā̎ bahu̱sūva̍rī ।
tasyai̎ vi̱śpatnyai̎ ha̱viḥ si̍nīvā̱lyai ju̍hotana ॥ 40 ॥
yā gu̱ṅgūryā si̍nīvā̱lī yā rā̱kā yā sara̍svatī ।
i̱ndrā̱ṇīma̍hva ū̱taye̎ varuṇā̱nīṃ sva̱staye̎ ॥ 41 ॥
oṃ śānti̱ḥ śānti̱ḥ śānti̍ḥ ॥