మహాలక్ష్మ్యష్టకమ్
నమస్తేఽస్తు మహామాయే శ్రీపీఠే సురపూజితే।
శఙ్ఖచక్రగదాహస్తే మహాలక్ష్మి నమోఽస్తుతే॥1॥
నమస్తే గరుడారూఢే కోలాసురభయఙ్కరి।
సర్వపాపహరే దేవి మహాలక్ష్మి నమోఽస్తుతే॥2॥
సర్వజ్ఞే సర్వవరదే సర్వదుష్టభయంకరి।
సర్వదుఃఖహరే దేవి మహాలక్ష్మి నమోఽస్తుతే॥3॥
సిద్ధిబుద్ధిప్రదే దేవి భుక్తిముక్తిప్రదాయిని।
మన్త్రమూర్తే సదా దేవి మహాలక్ష్మి నమోఽస్తుతే॥4॥
ఆద్యన్తరహితే దేవి ఆద్యశక్తిమహేశ్వరి।
యోగజే యోగసమ్భూతే మహాలక్ష్మి నమోఽస్తుతే॥5॥
స్థూలసూక్ష్మమహారౌద్రే మహాశక్తిమహోదరే।
మహాపాపహరే దేవి మహాలక్ష్మి నమోఽస్తుతే॥6॥
పద్మాసనస్థితే దేవిపరబ్రహ్మస్వరూపిణి।
పరమేశి జగన్మాతర్ మహాలక్ష్మి నమోఽస్తుతే॥7॥
శ్వేతామ్బరధరే దేవినానాలఙ్కారభూషితే।
జగత్స్థితే జగన్మాతర్ మహాలక్ష్మి నమోఽస్తుతే॥8॥
మహాలక్ష్మ్యష్టకం స్తోత్రం యః పఠేద్భక్తిమాన్నరః।
సర్వసిద్ధిమవాప్నోతి రాజ్యం ప్రాప్నోతి సర్వదా॥1॥
ఏకకాలే పఠేన్నిత్యం మహాపాపవినాశనమ్।
ద్వికాలం యః పఠేన్నిత్యం ధన-ధాన్యసమన్వితః॥2॥
త్రికాలం యః పఠేన్నిత్యం మహాశత్రువినాశనమ్।
మహాలక్ష్మిర్భవేన్నిత్యం ప్రసన్నా వరదా శుభా॥3॥