Home › Pooja Library › Ganesha Ashtakam — English

Ganesha Ashtakam

sarve ucuḥ ।

yato’naṃtaśakteranaṃtāśca jīvā
yato nirguṇādaprameyā guṇāste ।
yato bhāti sarvaṃ tridhā bhedabhinnaṃ
sadā taṃ gaṇeśaṃ namāmo bhajāmaḥ ॥ 1 ॥

yataścāvirāsījjagatsarvameta-
-ttathābjāsano viśvago viśvagoptā ।
tatheṃdrādayo devasaṃghā manuṣyāḥ
sadā taṃ gaṇeśaṃ namāmo bhajāmaḥ ॥ 2 ॥

yato vahnibhānū bhavo bhūrjalaṃ ca
yataḥ sāgarāścaṃdramā vyoma vāyuḥ ।
yataḥ sthāvarā jaṃgamā vṛkṣasaṃghāḥ
sadā taṃ gaṇeśaṃ namāmo bhajāmaḥ ॥ 3 ॥

yato dānavāḥ kinnarā yakṣasaṃghā
yataścāraṇā vāraṇāḥ śvāpadāśca ।
yataḥ pakṣikīṭā yato vīrudhaśca
sadā taṃ gaṇeśaṃ namāmo bhajāmaḥ ॥ 4 ॥

yato buddhirajñānanāśo mumukṣo-
-ryataḥ saṃpado bhaktasaṃtoṣadāḥ syuḥ ।
yato vighnanāśo yataḥ kāryasiddhiḥ
sadā taṃ gaṇeśaṃ namāmo bhajāmaḥ ॥ 5 ॥

yataḥ putrasaṃpadyato vāṃchitārtho
yato’bhaktavighnāstathā’nekarūpāḥ ।
yataḥ śokamohau yataḥ kāma eva
sadā taṃ gaṇeśaṃ namāmo bhajāmaḥ ॥ 6 ॥

yato’naṃtaśaktiḥ sa śeṣo babhūva
dharādhāraṇe’nekarūpe ca śaktaḥ ।
yato’nekadhā svargalokā hi nānā
sadā taṃ gaṇeśaṃ namāmo bhajāmaḥ ॥ 7 ॥

yato vedavāco vikuṃṭhā manobhiḥ
sadā neti netīti yattā gṛṇaṃti ।
parabrahmarūpaṃ cidānaṃdabhūtaṃ
sadā taṃ gaṇeśaṃ namāmo bhajāmaḥ ॥ 8 ॥

śrīgaṇeśa uvāca ।

punarūce gaṇādhīśaḥ stotrametatpaṭhennaraḥ ।
trisaṃdhyaṃ tridinaṃ tasya sarvakāryaṃ bhaviṣyati ॥ 9 ॥

yo japedaṣṭadivasaṃ ślokāṣṭakamidaṃ śubham ।
aṣṭavāraṃ caturthyāṃ tu so’ṣṭasiddhīravāpnuyāt ॥ 10 ॥

yaḥ paṭhenmāsamātraṃ tu daśavāraṃ dine dine ।
sa mocayedbaṃdhagataṃ rājavadhyaṃ na saṃśayaḥ ॥ 11 ॥

vidyākāmo labhedvidyāṃ putrārthī putramāpnuyāt ।
vāṃchitām̐llabhate sarvānekaviṃśativārataḥ ॥ 12 ॥

yo japetparayā bhaktyā gajānanaparo naraḥ ।
evamuktvā tato devaścāṃtardhānaṃ gataḥ prabhuḥ ॥ 13 ॥

iti śrīgaṇeśapurāṇe upāsanākhaṃḍe śrīgaṇeśāṣṭakam ।

OHTCC Assistant ✕
🙏 Namaste! How can I help you today?